Rundunar ‘yan sandan jihar Ogun ta ce jami’anta sun kama wasu mutane biyar da ake zargi da sayar da sassan jikin mutane.
An kama wadanda ake zargin ne a maboyarsu a lokacin da suke shirin gudanar da aikin nasu.
Jami’in hulda da jama’a na rundunar ‘yan sandan jihar, SP Abimbola Oyeyemi ne ya bayyana hakan a wata sanarwa da ya fitar ranar Lahadi.
SP Abimbola ya bayyana sunayen wadanda ake zargin kamar haka; Oshole Fayemi mai shekaru 60, Osemi Adesanya mai shekaru 39, Ismaila Seidu mai shekaru 30, Oseni Oluwasegun mai shekaru 69 da Lawal Olaiya mai shekaru 50.
PPRO ya bayyana cewa wadanda ake zargin ‘yan tsafi ne da suka rika tono gawarwaki daga cikin kaburburansu tare da cire wasu sassan jikinsu domin yin ibada.
Ya bayyana cewa an samu nasarar cafke wanda ake zargin mai yin tsafi ne a ranar Asabar a yayin da yake shirin yin wani zagayen girbi na sassan jikin dan Adam biyo bayan bayanan da ‘yan sanda suka samu a hedikwatar sashin Odogbolu.
Opeyemi ya ce wadanda ake zargin su ne ke da alhakin binne gawarwaki da aka yi a cikin al’ummar Ososa da ke karamar hukumar Odogbolu a jihar.
Ya kara da cewa, “da samun labarin, DPO Odogbolu reshen CSP Godwin Idehai, ya tattara mutanensa tare da kai farmaki maboyar wadanda ake zargin inda aka cafke biyar daga cikinsu.
“A yayin da ake yi musu tambayoyi, wadanda ake zargin sun yi ikirari cewa a zahiri suna sana’ar tono gawarwaki ne daga kaburburansu kuma suna sayar da sassan gawarwakin ga masu sayan su na jiran aiki wadanda ke bukatar ta don neman kudi.”
Abimbola, ya kara da cewa Kwamishinan ‘yan sanda, Frank Mba, ya bayar da umarnin a mika wadanda ake zargin zuwa Sashen Binciken Laifuka na Jiha domin bincike na gaskiya da kuma gurfanar da su gaban kuliya.
